Unë kam qenë që në fillimet e ngritjes së GLR Vorë dhe më pëlqeu angazhimi vullnetar, sepse e ndjej veten të dobishme, duke gjykuar se kontributi im ka pasur një vlerë, e cila është materializuar me aktivizimin dhe planet e GLR për të ardhmen.
Aktualisht jam studente pranë Akademisë ‘Nehemiah Gateway’, por nuk jam shkëputur nga aktivizimi rinor, udhëheq një projekt Re-Act mbështetur nga Qëndresa Qytetare dhe natyrisht, së bashku me anëtarët e Komitetit Organizativ të Këshillit Rinor Pogradec dhe disa prej anëtarëve, duke u përpjekur të hedhim dritë gjatë vendimmarrjes lokale mbi çështjet që janë me interes rinor. Këtë eksperiencë, dhe jo vetëm, pata mundësi ta ndaj edhe me të rinjtë e Grupit Lider Rinor Vorë, të cilët edhe pse të ngritur rishtazi kanë kryer një numër jo të vogël aktivitetesh të mbështetur nga projekti ‘‘Të rinjtë e marxhinalizuar: të rinjtë qeverisin me ide të reja dhe qasje progresive’’, të mbështetur nga donatorët që dikur kanë mbështetur edhe ngritjen e Këshillit Rinor Pogradec. Kjo ishte arsyeja e radhës e angazhimit tim vullnetar pranë kësaj strukture.
Situata e aktivizimit rinor nuk është në ditët më të mira, të paktën në rastin e qyteteve tona të vogla, por me mbështetjen e duhur, mund të mbillet tek ne dëshira për të qenë faktor në komunitet, për të përcjellë një energji të re mbi plotësimin e dëshirave tona dhe deri tek identifikimi i personave të ndryshëm që bëhen tok për të ndikuar tek institucionet vendimmarrëse lokale të kthejnë vëmendjen nga aspiratat dhe nevojat tona. Ky është misioni i aktivizimit tim, të cilin e gjeta të shprehur edhe tek veprimtaritë dhe entuziazmi i GLR Vorë.
Nga bashkëpunimi me GLR Vorë u prodhuan 10 projekt-propozime nga ana e stafit të projektit dhe GLR Vorë. Disa janë aktivitete që ne si KRP i kemi traditë si: Kinemaja verore; Marshimi i Pavarësisë; Qendra e Kurseve; Shpërblimi i Ekselentëve; Java Olimpike, Promovimi i Turizmit nëpërmjet Artit etj, por disa janë ide të reja dhe shumë interesante, të cilat planifikojmë t’i realizojmë paralelisht me GLR Vorë në të ardhmen, si psh projekti Duar-artët, Dita Jonë (Dita Kombëtare dhe Dita Ndërkombëtare e Rinisë); Talent Show; Karaoke Night etj.
Shpreh mbështetjen maksimale për grupimin e ri në Vorë, ju uroj suksese të përzemërta dhe si një nga koordinatoret e KRP ju garantoj vijueshmërinë e bashkëpunimit tonë në vijimësi. Zjarri nis me një shkëndijë, ne dhamë kontributin tonë modest, por jam e sigurtë se ky zjarr do të flakërojë vetëm nga dëshira dhe gjithëpërfshirja e të rinjve në zonë.
Gazetare: Risilda Topuzi
Janar 2023
